دفعت 3 أضعاف وفشلت! بعدها بنيت التطبيق بنفسي بالـ AI

إيه اللي حصل لما دفعنا لشركة تبني المشروع؟ ▶ 0:39

في 2019، كنت فاكر إن أصعب حاجة في البيزنس إنك تلاقي الفكرة. طلع لأ: أصعب حاجة إنك تحوّل الفكرة دي لمنتج حقيقي من غير ما تغرق في تكلفة وتأخير.

وقتها فكرنا نعمل موقع بيساعد الناس اللي بتشتغل E-commerce أو Dropshipping (إنك تبيع منتجات أونلاين من غير ما تشتري مخزون، والمورد هو اللي بيشحن للعميل مباشرة)³ يلاقوا الـwinning product، يعني المنتج اللي بيبيع. والموقع مش بس يقولك إن المنتج ده بيبيع؛ ده كمان يديك شوية أرقام، وشكل الإعلان، والـtarget، وحتى الموردين اللي تشتري منهم المنتج. من الآخر، بدل ما تقعد تلف وتعمل test وتجرب وتخسر في الإعلانات، الموقع بيختصرلك الطريق.

إحنا كان عندنا طرقنا اللي نجيب بيها الـdata، ونعرف المنتجات الماشية، ونحلل الإعلانات، ونطلّع الموردين. بس كان ناقصنا حاجة واحدة: البرمجة. والموقع ما كانش ينفع يتعمل بـtemplate جاهز، لأن فيه خطط واشتراكات مدفوعة، وdata بتتحدّث، وتجربة مستخدم مختلفة.

فقلنا الطبيعي نشوف شركة تنفّذ لنا المشروع. دوّرنا في مصر والإمارات، لغاية ما لقينا شركة ليها اسمها، وبتشتغل مع أسماء كبيرة. قعدنا، وشرحنا المشروع، والأسعار اتقدمت، وكلنا كنا مبسوطين.

استنينا شهور، وأخيرًا طلعت أول نسخة، وكانت محبطة جدًا: عاملة بالضبط زي البيتزا اللي ماما بتعملهالك في البيت. قلنا: يا جماعة، مش ده اللي إحنا عاوزينه. والرد كان دايمًا من نوعية: علشان نعمل كذا بالشكل اللي إنت عاوزه، محتاجين نعمل كذا، وده هيزوّد الوقت والتكلفة. طب ماشي. بعدها نكتشف حاجة تانية، فنرجع نطلب تعديل، والرد: ده هيحتاج وقت وتكلفة.

والسيناريو ده فضل يتكرر كتير. المشروع اللي كنا فاكرينه هيتبني في شهور قعد حوالي سنتين، والتكلفة تقريبًا وصلت لـ3 أضعاف. وفي الآخر طلع منتج يادوب يمشي، مليان مشاكل، ومش هو اللي في دماغنا، ومش كفاية حتى إنه يقنعنا نحط فيه طاقة وفلوس تاني. فقفلنا المشروع.

ليه المؤسس ما ينفعش يكون بعيد عن التنفيذ؟ ▶ 2:18

ساعتها اتعلمت درس غالي جدًا: لو إنت مؤسس وبتبني منتج رقمي، ما ينفعش تكون بعيد عن التنفيذ. مش لازم تبقى مبرمج محترف، بس لازم تفهم المنتج بتاعك تقنيًا لدرجة تخليك تسأل صح، وتراجع صح، وتعرف إمتى اللي قدامك بيبيعلك وقت بدل النتيجة.

ليه تطبيق الأزياء على Shopify كان أصعب من مشروع 2019؟ ▶ 2:31

تعدّي الأيام، ونوصل لـ2025، وأنا بفكر في مشروع جديد: تطبيق على Shopify يخدم متاجر الأزياء. الفكرة ببساطة: بدل ما الـstore يبيعلك تيشيرت بس أو بنطلون بس، التطبيق يساعده يبيعلك outfit كامل، look كامل: تيشيرت، وبنطلون، وshoes. وده معناه إن متوسط الـorder هيعلى، وبالتالي دخل وأرباح أكتر للـstore.

بس المشروع ده ما كانش أسهل من مشروع 2019. بالعكس، أصعب بكتير، لأنك مش بتعرض منتجات وخلاص. إنت محتاج تحلل كل منتج، وتفهم التصنيف، والألوان، وstyle كل قطعة، وإيه ينفع يتلبس مع إيه، وبعدين تستخدم AI يطلّع اقتراحات منطقية.

وفي نفس الوقت، لازم تحسب تكلفة الـtokens (الحتت الصغيرة اللي نماذج الـAI بتقسّم لها النص وهي بتقراه وبتكتبه)⁵، لأن استخدام نماذج الـAI بيتحاسب بعدد الـtokens.⁶ لو اقتراحك هيكلف كتير، التاجر مش هيشترك، ولو قللت التكلفة زيادة، النتايج هتبقى ضعيفة. فإنت طول الوقت بتوازن بين حاجتين: جودة النتايج والتكلفة.

إيه اللي اتغيّر لما بنيت التطبيق بنفسي بالـAI؟ ▶ 3:23

لما دخلت في التفاصيل دي، افتكرت اللي حصل معايا في 2019: افتكرت السنتين، والتكلفة اللي بقت 3 أضعاف، وأول نسخة اللي طلعت شبه البيتزا. وقلت: مش هكرر نفس الغلطة. المرة دي لازم أكون جوه التنفيذ.

بس كان فيه مشكلة صغيرة: أنا عمري ما كتبت كود، وده أصلًا مش مجالي. فمشيت بمبدأ بسيط جدًا: اللي يسأل ما يتوهش. بدأت أسأل ChatGPT، الشات بوت اللي عملته OpenAI (أوبن إيه آي)،⁴ بس مش بأسئلة عامة من نوعية «اعمل لي تطبيق». لأ، كنت بكسّر المشروع لأجزاء صغيرة.

بدأت معاه بأسئلة كتير عشان أحدد شكل المشروع، وإيه المشاكل اللي هحلها فيه. وبعد كده بدأت أدخل في الأجزاء الـtechnical: إزاي أعمل تطبيق على Shopify؟ كل سؤال كان بيطلّعلي خطوة، وكل خطوة كانت بتفتح باب لسؤال جديد.

والمفاجأة إن في شهرين بس، أول نسخة من المشروع كانت طالعة. مش نسخة كاملة، ومش مثالية، لكن نسخة تشتغل. بعدها شهرين كمان كانوا للتجربة وحل المشاكل، وتحسين النتايج، وتقليل التكلفة.

وفعلًا التطبيق اتنشر على Shopify، واتوافق عليه. والتطبيقات اللي عاوزة تتعرض في متجر تطبيقات Shopify لازم تتقدّم لفريق الموافقة عندهم وتستوفي كل الشروط.² ومتاجر بدأت تستخدمه، وفي براندين كبار دخلوا جرّبوه واستخدموه.

وهنا فهمت إن الفرق ما بين 2019 و2025 مش بس إن التكنولوجيا اتطورت. الفرق إن دوري أنا كمؤسس اتغيّر.

إمتى الـAI ممكن يخليك تبني منتج حقيقي؟ ▶ 4:36

الـAI مش هيخليك تبني أي حاجة من غير فهم.

لو فاكر إن الموضوع إنك تكتب له «اعمل لي تطبيق يجيب لي فلوس»، فغالبًا هتضيع وقتك. لكن لو إنت فاهم مشكلة حقيقية، وعارف العميل بتاعك مين، وعارف النتيجة اللي عاوز توصل لها، وقادر تكسّر المشروع لخطوات صغيرة، ساعتها الـAI ممكن يبقى أخطر شريك تنفيذي عندك. مش لأنه عبقري، لكن لأنه بيخليك تجرّب أسرع.

وده الفرق ما بين واحد بيتفرج على ثورة الـAI، وواحد بيستخدمها يبني حاجة حقيقية.

ولو عاوزني أعمل حلقة أشرح فيها إزاي تبدأ تبني أول منتج رقمي بالـAI، حتى لو إنت مش مبرمج، سيبلي أي كلمة في تعليقات الحلقة.