اقتصاد إطالة العمر!

هل ممكن ننضّف الجسم من الخلايا الهرمة؟ ▶ 1:16

تكنولوجيا إطالة العمر ببساطة هي أبحاث بتحاول تأخر الشيخوخة أو حتى تعكسها. والهدف مش إنك تعيش سنين أكتر وخلاص؛ الهدف إن السنين اللي بتعيشها وإنت بصحتك هي اللي تزيد.

والغريب إن مفيش إجابة واحدة لسؤال: إحنا ليه بنعجز؟ فيه أكتر من رهان، وكل رهان شايف المشكلة من زاوية مختلفة.

أول رهان بيقول: خلينا ننضّف الجسم. مع الوقت، بعض خلايا جسمك بتوصل لحالة غريبة: بتبطل تتقسم، بس برضه ما بتموتش. بتفضل في مكانها وبتطلّع مواد ممكن تعمل التهابات بتأذي اللي حواليها.⁵ العلماء بيسموها الخلايا الهرمة، وفي الإعلام بتتسمى خلايا الزومبي.

طب لو شلناها؟ سنة 2016، فريق من Mayo Clinic (مايو كلينك) جرّب ده على فيران متعدلة وراثيًا، بحيث يقدروا يمسحوا الخلايا دي بدوا.⁵⁶ والنتيجة: عمر الفيران زاد بحوالي الربع.⁵ والتكنولوجيا دي اترخصت لشركة ناشئة اسمها Unity Biotechnology (يونيتي بيوتكنولوجي).⁶

هل دوا الشيخوخة موجود عندنا أصلًا؟ ▶ 2:13

الرهان التاني فكرته أبسط: مش يمكن الدوا اللي بيأخر الشيخوخة موجود عندنا أصلًا؟

سنة 1964، بعثة طبية كندية راحت جزيرة إيستر (Easter Island)، الجزيرة المشهورة بالتماثيل الحجرية الضخمة في وسط المحيط الهادي، ورجعت بعينات من التربة.⁷ العينات وصلت لشركة أدوية، وهناك عالم اسمه Suren Sehgal (سورين سيجال) وفريقه لقوا فيها مادة بتقتل الفطريات، وسمّوها Rapamycin على اسم الجزيرة بلغة أهلها: Rapa Nui.⁷

بعدها بسنين، الشركة قفلت معملها والمشروع وقف. وهنا Sehgal عمل حاجة غريبة: أخد عينات من البكتيريا اللي بتنتج المادة دي، وخزّنها في فريزر بيته.⁷ وفي 1999 الدوا اتوافق عليه لمرضى زراعة الأعضاء؛ وظيفته إنه يهدّي مناعة الجسم عشان ما يرفضش العضو الجديد.⁷⁸

وبعد 10 سنين، في 2009، اتنشرت دراسة في مجلة Nature (نيتشر): الفيران الكبيرة في السن اللي خدت Rapamycin عاشت أطول، الإناث بنسبة 14% والذكور بنسبة 9%.⁹

بس قبل ما تفكر تجري على الصيدلية: دي نتيجة على الفيران، وده دوا وظيفته الأساسية إنه يضعّف المناعة.

هل نقدر نرجّع الزمن لورا جوه الخلية؟ ▶ 3:16

أما الرهان التالت فهو أكتر رهان طموح فيهم: إننا نرجّع الزمن لورا.

سنة 2006، عالم ياباني اسمه Shinya Yamanaka (شينيا ياماناكا) أخد خلايا ناضجة من فار، ودخّل فيها أربع جينات بس، فرجعت لحالة شبه الخلايا الجذعية (خلايا لسه ما اتخصصتش، وممكن تتحول لأي نوع خلايا جوه الجسم).¹⁰ والاكتشاف ده خد عليه جايزة Nobel سنة 2012.¹⁰ يعني الخلية جواها حاجة شبه زرار Reset.

بس فيه مشكلة: الـReset الكامل بيخلي الخلية تنسى هي مين أصلًا، فخلية الجلد مثلًا ما بقتش خلية جلد. ولو ده حصل جوه جسم حي ممكن يبقى خطر، ومن ضمن المخاطر السرطان.¹¹

فبقى السؤال: إزاي نرجّع الخلية أصغر من غير ما ننسّيها هي مين؟ في 2016، فريق من معهد Salk (سولك) شغّل عوامل Yamanaka لفترات قصيرة ومتكررة على فيران عندها مرض بيخليها تعجز بدري، والنتيجة إن عمرها زاد 30%.¹¹ والعالم اللي قاد التجربة قال بنفسه إن دي فيران، وإن تجديد شباب الإنسان هيبقى أعقد بكتير.¹¹

التجارب دي على الفيران بس وإن تجديد شباب الإنسان هيبقى أعقد بكتير جدًا

والفكرة دي بالظبط من الحاجات اللي Altos Labs بتراهن عليها.² وفي 2026، شركة تانية اسمها Life Biosciences (لايف بيوساينسز) بدأت تجرب على البشر علاج قايم على نفس الفكرة،¹³ بس مش عشان الشيخوخة: عشان أمراض في العصب البصري.¹²

وفي أكتوبر 2026 الشركة أعلنت أول نتايج، على تلات مرضى بس، في تجربة لسه في مرحلتها الأولى: المرضى التلاتة استحملوا العلاج من غير أعراض جانبية خطيرة لحد دلوقتي، واتنين منهم ظهر عليهم تحسن مبدئي في اختبار مجال النظر.¹² نتيجة مشجعة، بس على عدد صغير جدًا ومن غير مجموعة مقارنة.

ليه لحد دلوقتي مفيش دوا بيعالج الشيخوخة؟ ▶ 4:40

لو جمعنا التلات رهانات دي، هنلاقي نتايج حقيقية، بعضها مثير جدًا، بس أغلبها على الفيران. ولحد النهارده مفيش دوا واحد متوافق عليه بيقلل الشيخوخة.¹⁹ ولو بصيت كويس هتلاقي حاجة غريبة: Rapamycin اتوافق عليه من أكتر من 25 سنة في الأصل عشان زراعة الأعضاء، وفي 2015 اتوافق عليه كمان لمرض نادر في الرئة، بس مش عشان الشيخوخة.⁷²⁵ وإعادة البرمجة أول ما دخلت على البشر دخلت عشان مرض في العين، برضه مش عشان الشيخوخة.¹² يعني الاتنين دخلوا من باب مرض محدد.

جزء كبير من الإجابة مش جوه المعمل؛ هو في القواعد اللي بتحدد إيه اللي يتسمى مرض من الأساس.

امسك أي علبة مكمل غذائي أمريكي من اللي مكتوب عليها إنها بتدعم صحة الخلية أو بتساعدك تفضل شباب، وبص في ضهرها. في الآخر خالص هتلاقي جملة بخط صغير جدًا بتقول بالحرف إن الادعاء ده ما اتقيّمش من هيئة الغذاء والدوا الأمريكية، وإن المنتج مش مخصص لتشخيص أو علاج أو شفاء أو الوقاية من أي مرض.¹⁴ يعني العلبة اللي في إيدك بتقولك إنها مش دوا أصلًا.

طب ليه الجملة دي موجودة؟ لأن في أمريكا عالمين منفصلين تمامًا. العالم الأول هو الدوا: بيتعمل عشان يعالج مرض أو يمنعه، أو حتى يأثر على وظيفة معينة في الجسم.¹⁵ وأي دوا قبل ما يوصل للصيدلية لازم يعدي على سنين من التجارب، ويثبت إنه آمن وبيعمل اللي بيقول عليه في الاستخدام المحدد بتاعه.¹⁶¹⁷

العالم التاني هو المكمل الغذائي، وده ما بيحتاجش موافقة من الهيئة قبل ما ينزل السوق. الشركة هي المسؤولة عن أمانه، ومطلوب منها يكون عندها اللي يثبت إن كلامها صحيح ومش مضلل. وما ينفعش تقول إن منتجها بيعالج مرض؛ أقصى حاجة تقول إنه بيدعم وظيفة في الجسم، ولازم تحط السطر اللي قلتلك عليه.¹⁴

يعني لو عاوز تبيع حاجة ضد الشيخوخة بسرعة، الطريق مفتوح، بس هتبيعها كمكمل بكلام عام زي «بيدعم صحة الخلايا». أما لو عاوز تعمل دوا حقيقي ضد الشيخوخة، فهنا بتظهر أكبر مشكلة: هيئة الدوا بتوافق على أدوية ليها استخدام محدد، الدوا ده لعلاج كذا ويتقاس بكذا، والشيخوخة نفسها لحد دلوقتي مش معتمدة كمرض ينفع حد ياخد عليه موافقة دوا.¹⁸

والمشكلة التانية، وهي الأصعب: إنت هتقيس إيه؟ لو عندك دوا بيبطّأ الشيخوخة، الطريقة المثالية عشان تختبره إنك تدّيه للناس وتستنى تشوف هيعيشوا أطول ولا لأ. بس ده معناه تجربة تستمر لعشرات السنين،¹⁸ وعشان كده تجارب العمر الكامل لحد دلوقتي بتتعمل على الحيوانات بس.

عاوز تحارب الشيخوخة؟ اختار مرض واحد.

ودي القاعدة الفعلية لو حطيت كل ده جنب بعض، وهي اللي بتفسر اللي شفناه في Rapamycin وإعادة برمجة الخلايا.

ليه تجربة Metformin ما لقتش حد يموّلها؟ ▶ 7:16

بس فيه عالم لقى طريقة يلف بيها حوالين القاعدة دي، وخطته كانت جاهزة، وهيئة الدوا بنفسها وافقت عليها. اسمه Nir Barzilai (نير برزيلاي)، من Albert Einstein College of Medicine (كلية ألبرت أينشتاين للطب).¹⁸

فكرته كانت كده: ماشي، الشيخوخة مش معتمدة كمرض. بس لو جبنا دوا موجود ومعتمد، وجربناه على آلاف من كبار السن،¹⁹ ولقيناه بيأخر أمراض القلب والسرطان وغيرهم، يبقى ده أقوى دليل لحد دلوقتي إنه بيعمل حاجة في الشيخوخة نفسها.

والدوا اللي اختاره مش اختراع جديد: ده دوا سكر قديم اسمه Metformin، وتمنه رخيص جدًا. وهيئة الدوا الأمريكية وافقت على التجربة، واسمها TAME.¹⁸ ناقصها حاجة واحدة بس: التمويل، وتقديرات تكلفتها بين 45 و70 مليون دولار.¹⁹

ولو متخيل إن ده رقم كبير، افتكر إن شركة واحدة في المجال ده بدأت بحوالي 3 مليار دولار.² يعني التجربة دي كلها حوالي 2% بس من الرقم ده.

ومع ذلك، الفلوس ما جتش. طب فين شركات الأدوية؟ الدوا ده مالوش حقوق ملكية (دوا «جنيس»: حمايته انتهت، فأي شركة تقدر تصنّع نسخة منه وتبيعها)، يعني أي شركة تقدر تصنعه، وبالتالي مفيش شركة أدوية هتكسب منه فلوس زيادة. وده نفس اللي قاله Barzilai: العقبة الأساسية إن Metformin دوا جنيس، فمفيش شركة أدوية مستنية تكسب منه.¹⁹

فكّر فيها بمنطق الشركة: هتصرف عشرات الملايين وتستنى سنين عشان تثبت إن دوا رخيص بيشتغل، وأول ما تثبت ده، كل منافسينك يبيعوه بنفس التمن. يعني إنت دفعت تمن الإثبات، وكتير غيرك كسب.

طب مفيش متبرعين يقدروا يتولوا التجربة دي؟ للأسف، اللي بيتبرع غالبًا بيميل إنه يموّل حاجة جديدة الناس بتتكلم عنها، مش تجربة على دوا سكر قديم.¹⁸ والباحثين في المجال بيقولوا إن الناس غالبًا بتتبرع عشان مرض معين، مش عشان حاجة اسمها الشيخوخة. يعني حتى الفلوس الخيرية بتدور هي كمان على مرض محدد.

والموضوع مش مؤامرة. القواعد بتحدد إيه الأدوية اللي ينفع يتوافق عليها، والعائد هو اللي بيحدد مين مستعد يدفع تمن الإثبات. ولما الاتنين يتقابلوا، الفكرة الرخيصة اللي بتحاول تستهدف الشيخوخة نفسها بتقع في النص. والمفارقة إن الدوا اللي لو نجح كان هيبقى رخيص وينفع كل الناس تستخدمه، هو بالظبط اللي ما لقاش حد يدفع تمن تجربته.

وطبعًا إحنا لسه ما نعرفش إن كان الدوا ده هيأخر الشيخوخة فعلًا؛ ده اللي كانت التجربة هتثبته أو تنفيه.

هل المعاشات هتستحمل لو عشنا أطول؟ ▶ 9:16

خلينا نفترض إن كل العقبات دي اتحلت، وواحد من الرهانات نجح فعلًا، وبقى عندنا دوا بيزود سنين في عمر الإنسان. ساعتها هتظهر مشكلة من نوع تاني خالص: مش في المعمل ولا في هيئة الدوا، في الاقتصاد.

خد صندوق المعاشات بطريقة مبسطة. إنت بتشتغل سنين، وكل شهر بيتخصم جزء من مرتبك، وأول ما تطلع على المعاش فيه جهة بتدفعلك كل شهر لحد آخر يوم في حياتك: الحكومة، أو صندوق معاشات، أو شركة تأمين. وكلهم بيعملوا نفس الحساب: الناس متوقع تعيش قد إيه؟

طب لو الحسبة دي طلعت غلط؟ سنة 2012، صندوق النقد الدولي لقى إن الحكومات وصناديق المعاشات، في المتوسط، كانت بتقلل في توقعها لأعمار الناس بحوالي تلات سنين.²⁰²¹ ولما الصندوق حسب أثر التلات سنين دول، لقى إن تكاليف الشيخوخة في الدول الغنية ممكن تزيد بما يساوي نص اللي البلد بتنتجه في سنة كاملة.²¹²²

عشان نشوف الحسبة دي على أرض الواقع، تعالى نروح فرنسا (France). في مارس 2023، شوارع باريس (Paris) كان فيها آلاف الأطنان من الزبالة، لأن عمال النظافة عاملين إضراب،²³ والمظاهرات بقالها شهور. السبب إن الحكومة رفعت سن المعاش من 62 لـ64، ومبررها الرسمي كان إن الناس بقت بتعيش أطول، فلازم يشتغلوا أطول عشان نظام المعاشات يفضل قادر يدفعلهم. ولما حسوا إن البرلمان ممكن ما يوافقش، عدّوا القانون من غير تصويت.²⁴

ولو فرق زي التلات سنين في متوسط العمر عامل كل الحسبة دي، أومال لو الشركة اللي Sam Altman حط فيها 180 مليون دولار قدرت تحقق هدفها المعلن، وزودت عمر الإنسان 10 سنين وهو بصحته؟³⁴ إيه اللي ممكن يحصل؟

ده هدف مش نتيجة وماحدش يعرف هيتحقق ولا لأ

بس لو حاجة قريبة منه حصلت، الحسبة اللي الحكومات بتتلخبط فيها النهارده هتبقى أكبر بكتير.

وما ننساش إن فيه وش تاني للموضوع: لو السنين دي سنين صحة فعلًا، فالناس ممكن تقدر تشتغل وتنتج أكتر، والضغط على الرعاية الصحية ممكن يكون أقل. فالحسبة مش خسارة صافية، بس برضه هتغير في الاقتصاد. وصندوق النقد نفسه اتكلم عن طرق للتعامل مع مشكلة المعاشات: إن الدول ترفع سن المعاش،²⁰ أو ترفع الاشتراكات، أو تقلل المعاشات نفسها.²² تلات حلول، وفي كل حل فيهم حد بيدفع التمن.

لو الأبحاث نجحت، مين اللي هيستفيد؟ ▶ 11:28

وده يرجعنا لبداية الكلام. فاكر الراجلين؟ واحد متوقع يعيش حوالي 15 سنة أكتر من التاني.¹ طب لو الأبحاث دي نجحت، الفرق بينهم هيقل ولا هيزيد؟ اللي شفناه مش بيدي إجابة أكيدة، بس بيورينا الحسبة مايلة لأنهي اتجاه.

الفلوس بتروح أسهل للأبحاث اللي الشركات تقدر تمتلكها: علاج جديد لمرض محدد، يتباع بالسعر اللي صاحبه يقدر يحدده. وده مش عيب في حد؛ ده منطق الاستثمار. أما الحاجة اللي مالهاش صاحب، زي دوا قديم أي حد يقدر يصنعه، فبتلاقي صعوبة إن حد يدفع تمن إثباتها، حتى لو كانت هي الأقرب إنها توصل لكل الناس.

الخطر إن الأفكار الرخيصة تفضل من غير اختبار أو إجابة

يعني يمكن المشكلة مش إن العلم يكتشف حاجة غالية. لو الأفكار الرخيصة فضلت من غير اختبار، اللي هيوصل السوق هيبقى العلاج الغالي بس، وساعتها هيكون متاح لمجموعة قليلة من الناس، ويمكن الفجوة تزيد أكتر.

ودلوقتي قولّي: لو معاك 3 مليار دولار، هتستثمرهم إزاي في تأخير الشيخوخة؟ هتحطهم في أبحاث جديدة طموحة ممكن تفتح باب كبير، بس ماحدش يعرف هتوصل لإيه ولا هتبقى بكام؟ ولا هتصرفهم على تجارب أدوية قديمة ورخيصة، نتيجتها ممكن توصل لناس أكتر؟ قابلني في تعليقات الحلقة.